Natalia Lema Otero//- A pasada fin de semana celebrouse a Feira do Libro de Lugo. A cidade amurallada acolleu as diferentes casetas das librarías máis representativas.
Libros, verbas e moitos autores foron a premisa fundamental de dito evento. Entre todas estas actividades tivo unha gran relevancia a presentación da novela “Foron, Somos” cuxos autores son os lugueses José Estévez e Iria López, escritora do recente libro “Muxicas”. A libraría Cartabón foi a embaixadora deste evento que contou con varias actuacións musicais como de Ascen Romero, a Rexouba, Ying Zi Sun Dong (6 anos) e Nicolás Santoalla (10 anos) entre outros. Ademais disto os colaboradores da novela tiveron a oportunidade de ler os seus relatos que aparecen no libro. Estiveron entre outros Asun Blanco, X.A Rodríguez Vivián, Oti Campos, Matilde Páramo, Belén Rico, X.M Chanteiro e Luisa Arias .
A novela presentase como un libro vangardista que non pretende ser un máis referido ó tema da Guerra Civil. Un libro onde se pode percibir a veracidade dos relatos, a de tantos e tantos que estiveron no bando republicano e que sufriron as consecuencias do franquismo máis adustas.
Tanto a presentación de Foron,Somos como a de Muxicas foi un éxito rotundo dado que incluso se superou o aforo do recinto malia o mal tempo do sábado.Arestora o libro xa se pode mercar nas seguintes librarías: Alusdocandil (Arteixo), Cartabón (Vigo), Pensamentos (Padrón), Biblos (Lugo), Sisargas (A Coruña), Paz (Pontevedra), Pedreira (Santiago), Aira das Letras (Allariz), Lar (A Pobra do Caramiñal), Central Librera (Ferrol) , Day(Narón) e na Brañas, en Carballo.
