Manuel Muñiz presentou a escudería Xallas Motorsport en Radio Xallas
O presidente do equipo de automobilismo virtual (SimRacing) Xallas MotorSport, Manuel Muñiz, presentou no programa “Na Encrucillada” de Radio Xallas o novo proxecto deportivo nacido no concello de Santa Comba este verán.
Unha camiseta de Xallas MotorSport na Santa
«Non queríamos facer o mesmo, queríamos facer algo distinto», afirmou Muñiz sobre a filosofía do novo proxecto. Preguntado polo seu soño persoal para a escudería, respondeu: «O meu soño sería un día gañar un destes eventos grandes e que o Concello nos dese permiso para poñer unha camiseta á Santa na rotonda, para que toda Santa Comba saiba que somos un equipo máis de aquí».
Engadiu ademais o seu interese en levar o equipo a feiras de autónomos coa exhibición dun simulador propio e participar na vida social xalleira. Sobre o funcionamento interno, Muñiz resumiu así a súa filosofía de traballo: «Cando temos unha idea clara, gústanos ir ata o final, dar todo o que temos».
Un equipo de nove persoas
O equipo está formado por nove persoas. Na directiva figuran o propio Muñiz como presidente; Francisco Javier Otero, director deportivo e secretario; e María Montenegro, encargada do deseño gráfico, das skins dos vehículos e das redes sociais. Como vogal actúa Jorge Ibarra, piloto mexicano. Completan a formación os pilotos José Calvín, da Coruña; Nico García, de Carballo, tamén responsable da páxina web do equipo;Borex Cholakov , residente en Alicante; Juanma Sierra, de Santander, e Javier Sacristán ”Jasaca”, enxeñeiro de Barcelona.
Muñiz indicou que o equipo se atopa en proceso de legalización como asociación de automobilismo virtual e que busca achegarse ao tecido empresarial da comarca para conseguir patrocinios.
Respecto ao calendario deportivo, o presidente avanzou que o equipo disputará proximamente os 1.000 quilómetros de Suzuka, en Xapón, e o Petit Le Mans, en Road Atlanta (Estados Unidos).
A proba nipona será xa este sábado.
