A Confederación Intersindical Galega (CIG) concentrouse esta mañá diante do Concello de Ponteceso (A Coruña) para respaldar a unha delegada sindical do Servizo de Axuda no Fogar (SAF), a quen o sindicato afirma que o alcalde, José Manuel Mato, acusou de forma grave durante o pleno do 27 de maio. A concentración coincidiu co acto de conciliación celebrado no Xulgado de Paz, trámite previo esixido antes de presentar unha querela por presunto delito de inxurias e/ou calumnias. Segundo a CIG, o rexedor non acudiu á cita, polo que o caso pasará á vía penal.
«Ás lamentábeis declaracións do alcalde de Ponteceso hai que engadirlle agora a súa covardía. Hoxe tiña moi fácil pórlle remate aquí a esta situación e evitar ter que ir a xuízo polo penal, pero non quixo», afirmou o secretario comarcal da CIG da Coruña, Óscar Calvo, durante a protesta. Calvo asegurou que a central sindical «continuará a defender a honra da compañeira e os dereitos sindicais onde sexa preciso».
O responsábel da Unión Local de Carballo, Martín Caamaño, criticou pola súa banda que o alcalde non se presentase na conciliación e cualificou de grave o asunto, «posto que se utilizou un foro democrático como é o pleno municipal para tentar coartar as liberdades e dereitos fundamentais dunha traballadora e delegada de persoal», segundo as súas palabras.
Querela por vía penal
De acordo coa versión da CIG, no pleno de maio o rexedor cuestionou publicamente a actividade sindical da delegada, reprochoulle supostamente o uso das horas sindicais e chegou a sinalala por, presuntamente, deixar o seu posto sen atender a unha usuaria. O sindicato sostén ademais que lle atribuíu o envío de mensaxes intimidatorias a outras traballadoras para disuadilas de concorrer a candidaturas rivais.
Segundo a CIG, no trámite de conciliación pedíaselle ao alcalde que recoñecese como incertas esas afirmacións e compensase á traballadora. Ao non comparecer, a vía que queda aberta é a querela por vía penal, que será presentada segundo confirmou o sindicato.
