O deputado do BNG no Congreso, Néstor Rego, reclamou ao Goberno central que adopte de forma urxente medidas para reforzar o persoal e os medios da oficina do Instituto Nacional da Seguridade Social (INSS) en Carballo, que dá servizo a máis de 120.000 persoas da localidade e da súa comarca. Segundo o BNG, a oficina funciona actualmente con menos da metade do cadro de persoal necesario, o que xera dificultades importantes para a veciñanza á hora de realizar trámites relacionados coa Seguridade Social.
A esta carencia de persoal súmase, segundo denuncia a formación nacionalista, o colapso do sistema de cita previa, que en moitos casos impide obter unha atención en prazo. Isto obriga a numerosas persoas a desprazarse a outras localidades para completar os seus trámites, ou a acudir ao rexistro do Concello de Carballo para presentar documentación ao non poder facelo directamente na oficina do INSS.
«Non é aceptábel que unha persoa que precisa realizar un trámite ante a Seguridade Social non poida ser atendida porque non consegue unha cita ou que teña que desprazarse decenas de quilómetros para poder exercer un dereito», afirmou Rego.
Reforzar de inmediato o cadro de persoal
O deputado esixiu ao Executivo reforzar de inmediato o cadro de persoal da oficina carballesa e resolver as deficiencias na recepción e rexistro de documentación, de xeito que a cidadanía poida presentar os seus escritos sen ter que recorrer a outras administracións.
«O Estado ten a obriga de garantir uns servizos públicos accesibles e de calidade. Non pode converter a falta de persoal e o colapso da cita previa nunha barreira para acceder ás prestacións e aos dereitos da Seguridade Social», engadiu Rego.
O BNG reclamou tamén recuperar unha atención presencial suficiente nas oficinas do INSS, para que a cita previa obrigatoria non se converta nun impedimento para quen necesita realizar xestións de forma presencial, unha demanda que, segundo o partido, xa formulou en reiteradas ocasións.
