A portavoz nacional do BNG, Ana Pontón, presentou este luns desde Carballo o ‘Plan Máis Ensino Público’, unha proposta para abaratar ás familias a volta ao colexio e mellorar a calidade do sistema educativo público. O plan inclúe a recuperación da gratuidade dos libros de texto, a universalización do servizo de comedores escolares e de madrugadores, e un incremento do investimento educativo até acadar o 4% do PIB nesta lexislatura. Entre as medidas propostas figuran tamén o aumento do profesorado, a redución das ratios nas aulas, a eliminación de burocracia nos centros e programas específicos de apoio para o alumnado con Necesidades Específicas de Apoio Educativo (NEAE).
Xuntanza de Ana Pontón en Carballo
Pontón realizou o anuncio tras unha reunión coa dirección e a ANPA do CEIP Bergantiños de Carballo, xunto ao alcalde da localidade, Daniel Pérez. O centro, con preto de 550 alumnos e alumnas, sufriu este curso un recorte de media praza de Audición e Linguaxe, mentres que 90 familias do concello quedaron sen praza de comedor escolar. «Temos un centro que está por riba da media en canto a necesidades educativas especiais e as medidas que adopta a Xunta é reducir apoio a este alumnado», denunciou.
A dirixente nacionalista situou en 500 euros de media o gasto por neno ou nena que supón a volta ao cole ás familias. Sinalou ademais que Galicia é, segundo datos da AIReF, a comunidade que menos investiu por habitante en educación, con 1.095 euros, 200 euros menos que a media estatal, fronte a 367 millóns destinados ao ensino privado.
Pontón criticou tamén que o presidente da Xunta, Alfonso Rueda, viaxase este luns a Madrid en lugar de asistir ao Consello da Xunta.
