A praia do Ézaro, no concello de Dumbría, acollerá este sábado 22 de agosto a xornada «A Arte no Ézaro. Historia, Tradición e Identidade», unha iniciativa que recreará o retrato que a fotógrafa Ruth Matilda Anderson tomou na localidade en 1924.
A convocatoria arrancará ás 11.00 horas e está aberta á veciñanza de todas as idades, así como ás persoas interesadas en documentar graficamente a xornada. A actividade homenaxea as mulleres coñecidas como seboleiras, que compaxinaban o traballo na casa, na leira e no mar para sacar adiante as súas familias.
Como novidade, nesta edición súmanse á fotografía os homes, que tradicionalmente desenvolvían ese labor desde as embarcacións, largando o aparello da arte, que na súa época chegaba ata as inmediacións do Pindo.
Leti da Taberna
O programa da mañá incluirá tamén un obradoiro de nós mariñeiros a cargo de veciños con experiencia no mar, e unha explicación sobre a orixe do topónimo popular dos veciños do Ézaro, «seboleiros», vinculado ao cultivo da cebola na zona. A xornada matinal rematará cunha sardiñada para as persoas participantes.
Xa pola noite, ás 21.00 horas, o edificio Bitácora acollerá a actuación de Leti da Taberna, dentro do proxecto «Enredadas no Camiño», impulsado pola Xunta de Galicia a través do programa O teu Xacobeo. Entre as 22.30 e as 00.30 horas poderá verse o espectáculo audiovisual da Fervenza do Ézaro.
A iniciativa, difundida polo Concello de Dumbría, formúlase co obxectivo de poñer en valor o patrimonio inmaterial e a historia local.
FOTO- ANA GARCÍA
