O Concello de Vimianzo deu por rematados os traballos de mellora e ampliación do vial de acceso ao lugar da Gándara, unha actuación que dota esta entrada dunha maior amplitude e de mellores condicións de circulación.
A intervención abrangue preto de 500 metros de lonxitude e permitiu ampliar o vial ata os 6,5 metros de ancho. Os traballos incluíron escavación, mellora da base, pavimentación e aglomerado, así como a execución de cunetas, instalacións e sinalización.
O proxecto contemplou tamén a creación dunha senda peonil nunha das marxes do vial, co obxectivo de mellorar as condicións de seguridade das persoas que se desprazan a pé, e a colocación de elementos de contención mediante escollera.
Un dos factores que condicionou a obra foi a necesidade de cumprir coas esixencias de Augas de Galicia para obter a autorización preceptiva. Entre esas condicións figuraba a colocación de doce marcos de dous metros por 1,60 metros, un requisito que supuxo un incremento do custo final da actuación, pero que resultaba indispensable para poder executar a mellora.
O Concello agradeceu a colaboración dos titulares das parcelas situadas a ambas as marxes do vial, cuxa disposición fixo posible a ampliación, así como a da directiva da Comunidade de Montes da Gándara, que cedeu os terreos necesarios para executar os viais e a senda peonil.
«Era unha actuación necesaria e moi demandada, e hoxe podemos dicir que a Gándara conta cunha entrada nova, máis ampla e con mellores condicións de seguridade e accesibilidade», sinalou a alcaldesa de Vimianzo, Mónica Rodríguez Ordóñez.
O goberno local enmarcou esta intervención na mellora e posta a punto das vías municipais, actuando sobre os puntos que precisan renovación e maior seguridade para a veciñanza e as persoas usuarias.
