A Oficina de Información Cultural-Turística de Brandomil rexistra visitantes de 31 provincias españolas no seu primeiro mes de apertura
A Oficina de Información Cultural e Turística «Brandomil. Porta romana da Costa da Morte» recibiu, no seu primeiro mes de funcionamento neste mes de xullo de 2026, visitantes procedentes de 31 provincias pertencentes a 13 comunidades autónomas españolas, segundo os datos facilitados pola Fundación Brandomil, entidade que xestiona e financia o equipamento.
Entre o público estranxeiro rexistráronse visitantes de 16 nacionalidades distintas, con presenza destacada de turistas procedentes de Alemaña, Países Baixos e Suíza. Tamén se contabilizaron chegadas desde México, Finlandia, Colombia, Italia e Estados Unidos, entre outros países.
Segundo os mesmos datos, o 30% da afluencia total á Oficina corresponde a visitantes procedentes doutras zonas de Galicia, principalmente dos concellos da contorna, que se achegan a Brandomil para coñecer o patrimonio da zona como parte dun percorrido dun día ou dunha fin de semana, aproveitando a contorna do río Xallas.
A Fundación Brandomil salientou tamén a influencia dos Camiños Xacobeos que unen Santiago de Compostela coa Costa da Morte, xa que parte dos visitantes rexistrados, tanto locais como estranxeiros, realizan o Camiño entre Santiago e Muxía, xa sexa a pé, en bicicleta ou en coche, e fan parada en Brandomil durante o percorrido.
A Oficina de Información Cultural e Turística «Brandomil. Porta romana da Costa da Morte» leva funcionando desde este verán como punto de información para os visitantes que percorren a conexión entre o interior da provincia da Coruña e a Costa da Morte
