O alcalde de Santa Comba, Alberto Romar, explicou nunha intervención en Radio Xallas, a situación de escaseza de auga que afecta ao municipio dende hai varios días. Segundo indicou, o abastecemento depende da captación no río Abuín, cuxo caudal leva anos en descenso, o que provocou que os depósitos municipais chegasen a baixar a menos do 18% da súa capacidade na madrugada do martes ao mércores.
Ante esta situación, o concello aplicou cortes de subministro en varias zonas, decisión que o rexedor xustificou por criterios técnicos ligados ao estado das canalizacións antigas, que poderían sufrir roturas se se restablecía o servizo de forma brusca.
Alberto Romar: «Estámolo dándo todo, sen límite»
Entre as medidas postas en marcha, citou a contratación de dúas empresas para achegar auga aos depósitos mediante camións cisterna, a incorporación de dúas motobombas do Consorcio de Bombeiros e a posta en marcha dunha cisterna de 30 metros cúbicos. O concello aprobou tamén un decreto de urxencia para autorizar gastos extraordinarios. O alcalde afirmou: «Estámolo dándo todo, sen límite».
Romar precisou que o consumo diario do municipio se sitúa en 1.500 metros cúbicos, fronte a unha captación que chegou a caer a 700, polo que resulta necesario complementar o subministro ata alcanzar os 800 metros cúbicos diarios. Tamén se restrinxiu o uso a grandes consumidores que superan os dez metros cúbicos ao día.
O alcalde anunciou que a solución definitiva pasa por un investimento de entre oito e nove millóns de euros para construír unha nova estación de tratamento que capte auga do río Xallas, proxecto xa presentado á Xunta de Galicia en outubro, que agarda poida materializarse.
A choiva de Santa Comba
Romar pediu que non se politice a crise e agradeceu o traballo do persoal municipal e da empresa concesionaria durante os últimos días.O alcalde desmentiu os comentarios sobre o rego do campo de fútbol de herba artificial, afirmando: «Falar do campo do Fontela é non ter vergonza».
Sobre a alta pluviosidade de Santa Comba e a actual falta de auga, o rexedor subliñou: “A choiva por si soa non soluciona o problema, xa que Santa Comba carece de pantano ou punto de almacenamento propio. Por iso, aínda que chova, a auga dispoñible depende directamente do caudal dos ríos en cada momento”.
