O BNG anunciou este martes a presentación dunha demanda xudicial contra o portavoz municipal do PSOE de Muxía, Iago Toba, por reiterados ataques verbais e descualificacións dirixidos contra a portavoz nacionalista no concello, Mercé Barrientos.
A responsable da Área de Organización do BNG, Lucía López, denunciou en comparecencia que o comportamento do edil socialista «superou todos os límites» e advertiu de que a formación «non o vai consentir». «A confrontación de ideas forma parte da democracia, pero o insulto, a intimidación e a falta de respecto non poden formar parte da vida pública», afirmou, ao tempo que reclamou á dirección do PSOE que asuma responsabilidades pola gravidade dos feitos.
López sinalou que se trata dunha «deriva inaceptable» mantida no tempo, baseada en «agresións verbais, ataques persoais e descualificacións constantes», e engadiu que os ataques teñen «unha clara dimensión machista» ao buscar «desacreditar, intimidar e expulsar as mulleres do espazo público».
Declaracións de Mercé Barrientos
Pola súa banda, Barrientos cualificou de «absolutamente inaceptables» as expresións recibidas por parte do voceiro socialista, e lembrou que estas inclúen comentarios de contido sexista e descualificador proferidos en diferentes sesións plenarias, cuxo ton e reiteración, segundo indicou, «non quedan recollidos» integramente nas actas municipais.
«As actas recollen algunhas palabras, pero non poden recoller as risas, os acenos agresivos, o ton de voz nin a reiteración constante dos insultos» sinalou. A concelleira nacionalista afirmou que denuncia a situación «pola miña familia, pero tamén por todas as mulleres». Barrientos mostrouse especialmente preocupada porque este tipo de comportamentos procedan dun representante «dun partido que se di progresista e feminista».
O BNG amosou o seu respaldo íntegro a Mercé Barrientos e reclamou ao PSOE representantes que «confronten proxectos, non que recorran ao insulto e á descualificación».
