O sindicato UGT informou da sentenza da Sección Social do Tribunal de Instancia da Coruña que obriga ao Concello de Corcubión a adaptar á quenda de mañá a xornada laboral dunha traballadora por razóns de conciliación familiar. A resolución estima que se vulnerou o dereito fundamental á non discriminación por razón de sexo ao non responder o Concello de forma motivada á solicitude nin abrir un proceso de negociación.
O tribunal considera acreditadas as necesidades de coidado dun menor e conclúe que a Administración non xustificou con razóns organizativas ou produtivas a negativa á adaptación horaria.
A sentenza entende que a imposición dun horario incompatible co horario escolar da menor supuxo un prexuízo efectivo para a traballadora e declara vulnerado o artigo 14 da Constitución, seguindo a doutrina fixada polo Tribunal Constitucional sobre os dereitos de conciliación.
O concello, un obstáculo
Na súa valoración, UGT considera que resulta difícil conciliar co principio de legalidade que unha administración pública, chamada a garantir os dereitos fundamentais e a igualdade efectiva, adopte unha interpretación restritiva da conciliación e obrigue unha traballadora a acudir aos tribunais para defender a súa vida familiar.
O sindicato sostén que, nestes casos, a Administración deixa de actuar como garante dos dereitos para converterse nun obstáculo para o seu exercicio e destaca que a sentenza condena ao Concello de Corcubión a implantar de inmediato a adaptación da xornada solicitada.
