Paiosaco celebra a Festa das Cereixas os días 4 e 5 de xullo con música, verbena e actividades culturais
A parroquia de Paiosaco, no concello da Laracha, acollerá os días 4 e 5 de xullo de 2026 unha nova edición da Feira das Cereixas, declarada Festa de Interese Turístico de Galicia, cun programa que combinará música, tradición e actividades para todos os públicos.
A programación comezará o sábado 4 de xullo cunha sesión vermú ás 14.00 horas amenizada polo Dúo Charada. Pola noite celebrarase a verbena coa actuación do Grupo Bomba, acompañada das orquestras Impacto, DJ Drew Korme e da Festa Elite con DJ Javi.
O domingo a Feira das Cereixas
O domingo 5 de xullo terá lugar a tradicional Feira das Cereixas, que abrirá ás 12.00 horas coa animación da Charanga Malandros e dunha Escola de Samba.
A sesión vermú, prevista para as 14.30 horas, contará coa actuación do Dúo Xilo e Carlos. Xa pola tarde, ás 20.00 horas, actuará a Asociación Cultural Queiroga.
A programación concluirá ás 22.00 horas coa actuación do grupo Radio Cos, seguida dun remate sorpresa con fogos de artificio, que porá o punto final ás celebracións.
A Feira das Cereixas de Paiosaco está organizada co apoio do Concello da Laracha, da Deputación da Coruña, da Xunta de Galicia e de ABANCA.
Obradoiro infantil de cociña
Este ano o concello da Laracha incorpora ao programa deste ano un obradoiro infantil de cociña. A actividade celebrarase no propio recinto feiral e permitirá aos participantes desfrutar dunha experiencia culinaria na que as cereixas serán o ingrediente protagonista.
O obradoiro está dirixido a nenos e nenas de entre 5 e 12 anos e desenvolverase en dúas quendas: de 10:30 a 11:45 horas e de 12:15 a 13:30 horas.
A inscrición é gratuíta, pero requírese realizala previamente dado que as prazas son limitadas. O prazo abrirá mañá martes ás 10:00 horas. As persoas interesadas poden anotarse cubrindo o formulario dispoñible na páxina web e nas redes sociais municipais, chamando ao teléfono 647 828 510 ou enviando un correo electrónico a turismo@alaracha.gal.
Esta iniciativa pretende propoñer aos máis novos unha experiencia participativa e divertida para contribuír a reforzar o carácter familiar e dinamizador da Feira das Cereixas de Paiosaco como un dos eventos máis representativos do calendario festivo e gastronómico do municipio.
