A Deputación da Coruña aprobou o convenio de colaboración con Augas de Galicia e os concellos de Cee e Corcubión para a construción dunha nova estación depuradora de augas residuais (EDAR), unha infraestrutura considerada estratéxica para mellorar o saneamento da ría e substituír a actual instalación, xa obsoleta.
O investimento total previsto ascende a 13.870.999,70 euros, dos que o 80% será financiado polo Fondo Europeo de Desenvolvemento Rexional (FEDER) e Augas de Galicia. O 20% restante será asumido polas entidades locais, cunha achega na que a Deputación da Coruña contribuirá con 1,4 millóns de euros distribuídos en dúas anualidades de 700.000 euros.
Este financiamento permitirá apoiar aos concellos de Cee e Corcubión, que achegarán 1.030.674,93 euros e 343.525 euros respectivamente. Segundo o convenio, a nova infraestrutura estará situada no municipio de Cee, preto da rúa Fornelos e da zona de servidume do porto de Brens, o que permitirá manter operativa a depuradora actual durante a execución das obras.
O presidente da Deputación, Valentín González Formoso, destacou que “un investimento deste importe sería imposible de asumir en solitario para os dous concellos”, subliñando a importancia da cooperación institucional. Engadiu que “a Deputación está para isto: para axudar aos concellos cando teñen diante investimentos que son imprescindibles”.
Formoso sinalou tamén que “coa nova EDAR damos un paso decisivo para que Cee e Corcubión conten cun saneamento con máis capacidade e adaptado ás necesidades actuais e as que veñan no futuro”.
A nova planta está deseñada para unha poboación superior a 16.400 habitantes equivalentes e incluirá sistemas avanzados de tratamento biolóxico, desinfección ultravioleta e liña de fangos, entre outras tecnoloxías. A actuación busca mellorar a calidade das augas e contribuír á rexeneración ambiental da ría de Cee-Corcubión.
