A eurodeputada do BNG, Ana Miranda, anunciou o traslado ao Parlamento Europeo de accións parlamentarias contra dous proxectos industriais na provincia da Coruña: a macroplanta de biogás proxectada en Soandres (A Laracha) e o proxecto mineiro no lugar de Coéns (Laxe).
Tras reunirse este sábado coas respectivas plataformas veciñais afectadas, a representante nacionalista confirmou a activación de ferramentas comunitarias para frear o que cualificou de «proxectos depredadores do medio ambiente». Estivo acompañada polo deputado autonómico, Oscar Insua e polo responsable comarcal, Xosé Manuel Pose.
Planta de Biogás en Soandres
No caso de Soandres, onde Miranda abordou a problemática xunto á portavoz local Carolina Castiñeiras ante máis dun centenar de afectados, a europarlamentaria ofreceuse a tramitar unha denuncia formal ante a Comisión de Peticións do Parlamento Europeo. O BNG busca que as institucións comunitarias fiscalicen o proxecto, tras remitir xa unha pregunta escrita á Comisión Europea en maio para alertar sobre a posible afectación a zonas naturais protexidas e esixir responsabilidades aos gobernos galego e español.
Proxecto mineiro de Coéns
Por outra banda, no lugar de Coéns (Laxe), a visita estivo coordinada pola voceira municipal Cristina Vázquez del Prisco. Tras recibir a documentación por parte do colectivo veciñal que rexeita a explotación mineira, Miranda comprometeuse a rexistrar unha nova pregunta parlamentaria dirixida á Comisión Europea.
Esta iniciativa esixirá que o executivo comunitario aclare se a mina cumpre coa normativa estrita da Unión Europea en tres eixes fundamentais: a sustentabilidade ambiental, a protección do patrimonio e o grao de afectación directa ás vivendas da zona.
