O presidente da Deputación da Coruña, Valentín González Formoso, e o alcalde de Dumbría, Raúl González Lado, supervisaron o reinicio das obras de ampliación e mellora da estrada provincial DP-2302, que une os núcleos de Hospital e Brens, unha actuación na que a institución provincial inviste 1,69 millóns de euros.
Os traballos afectan a un tramo de preto de 3,8 quilómetros e teñen como obxectivo completar unha actuación considerada estratéxica para mellorar as comunicacións e incrementar a seguridade viaria nunha vía utilizada habitualmente pola veciñanza de Dumbría e da Costa da Morte.
A Deputación encargou a execución das obras á empresa pública TRAGSA, tras a resolución do contrato anterior debido ás demoras acumuladas e ao abandono dos traballos por parte da adxudicataria inicial. As obras comezaran en 2021 cun orzamento de máis de 826.000 euros, pero quedaron paralizadas durante varios anos.
Segundo explicou Formoso, a decisión busca garantir “unha solución rápida e definitiva” para rematar a actuación no menor prazo posible. Pola súa banda, González Lado destacou a importancia da intervención para a mobilidade e a seguridade da veciñanza.
O proxecto inclúe o asfaltado integral da estrada, a instalación de novas barreiras de protección, melloras na drenaxe, a retirada de elementos deteriorados e a execución de obras complementarias. Tamén se ampliará a plataforma da vía, que contará con dous carrís de circulación e beiravías, ademais da construción dunha senda peonil de dous metros de ancho nun dos seus marxes.
As actuacións completaranse coa mellora das interseccións, a corrección de curvas, nova sinalización vertical e horizontal e a instalación dos elementos de seguridade necesarios. O prazo previsto para a execución das obras é de oito meses. Na visita tamén participou a deputada de Vías, Mónica Rodríguez.
