O Concello de Zas saíu ao paso das informacións difundidas nos últimos días sobre o permiso de investigación mineira denominado ‘Jorge Reyes’, situado na zona de Fornelos, e aclarou que o expediente actualmente en tramitación corresponde unicamente a unha fase de investigación e non a unha concesión de explotación.
Nun comunicado, o Goberno municipal indicou que esta circunstancia figura na publicación realizada no Diario Oficial de Galicia e subliñou que a tramitación, avaliación e resolución deste tipo de procedementos corresponde exclusivamente á Xunta de Galicia a través do departamento autonómico competente en materia mineira.
O concello de Zas non participa nestas autorizacións
O executivo local precisou ademais que o Concello non participa na autorización destes permisos nin ten capacidade para modificalos ou resolvelos. En relación coa petición de información presentada polo grupo municipal do PSdeG-PSOE, explicou que esta se rexistrou despois de que o asunto adquirise difusión pública, circunstancia que, segundo sinala, contribuíu a aumentar o interese e a preocupación entre a veciñanza.
Segundo informou a administración local, desde a publicación do expediente no DOG estase a realizar un seguimento do procedemento e a recompilar información técnica para coñecer con maior precisión o alcance da actuación prevista. Neste traballo xa se dispón de documentación cartográfica que permite delimitar a área afectada na contorna de Fornelos.
Lamentan a confusión xerada
O alcalde de Zas, Manuel Muíño, tiña previsto manter este martes un encontro co presidente da Asociación de Veciños A Fonte para trasladarlle a información dispoñible sobre a situación. O Concello tamén avanzou que non descarta a convocatoria dunha reunión aberta á cidadanía para explicar o estado do expediente e responder ás posibles dúbidas.
O Goberno municipal lamentou a confusión xerada arredor deste asunto e reiterou que a publicación do permiso de investigación no DOG “non implica autorización de explotación nin actuación inmediata no territorio”. Así mesmo, pediu que as consultas sobre a tramitación sexan dirixidas á Xunta de Galicia, administración responsable do procedemento.
