A campaña arqueolóxica desenvolvida durante 2026 no Castro das Barreiras, en Vimianzo, permitiu realizar novos achados que amplían o coñecemento sobre este xacemento da Costa da Morte e apuntan a unha ocupación máis antiga da considerada ata o momento.
Os traballos centráronse nun tramo da muralla, onde os arqueólogos documentaron un sistema de acceso á fortificación mediante escaleiras. Segundo informou o Concello, esta estrutura contribúe a comprender mellor a organización interna do asentamento e o funcionamento das súas defensas.
Un dos descubrimentos máis destacados foi a identificación dun espazo de carácter sacro situado xunto á muralla. A área aparece delimitada por varios altares con betilos, un achado que, segundo os responsables da intervención, reforza a interpretación deste sector non só como elemento defensivo senón tamén como un lugar con valor simbólico para a comunidade castrexa que habitou o enclave.
Entre os materiais recuperados predominan os de tradición indíxena, mentres que apenas se localizou un fragmento de cerámica romana. Estes restos permitirán avanzar no estudo das prácticas relixiosas das comunidades castrexas e na evolución dos espazos rituais documentados noutros asentamentos costeiros galegos.
Unha vivenda
A campaña tamén sacou á luz unha vivenda situada baixo niveis de ocupación xa coñecidos. Aínda que as análises continúan en marcha, as primeiras evidencias apuntan a que podería corresponder a unha fase moi temperá do asentamento, posiblemente relacionada coas primeiras etapas da Idade do Ferro.
Para garantir a conservación dos restos, o equipo arqueolóxico dirixido por Tito Concheiro aplicou medidas de protección preventiva nos elementos máis sensibles descubertos durante a escavación.
Á vista dos resultados, as próximas campañas ampliarán a área de traballo cara a sectores próximos da muralla e das zonas de hábitat co obxectivo de profundar no estudo do santuario castrexo e das primeiras ocupacións do Castro das Barreiras.
