O Colexio de Procuradores da Coruña advertiu da situación de colapso que afecta aos xulgados do partido xudicial de Carballo. Segundo denuncian, existen demandas e escritos acumulados con ata dous anos de atraso sen tramitar debido á falta de persoal e á elevada rotación da plantilla.
A problemática afecta ás áreas de tramitación, instrución, execución e reparto de asuntos. No caso das execucións hipotecarias e non xudiciais, os atrasos alcanzan ano e medio só para admitir os expedientes a trámite.
Tamén existe sobrecarga no rexistro e reparto de asuntos, onde unha única persoa asume a distribución de demandas civís, denuncias e querelas, ademais doutras funcións como gardas e poderes apud acta.
O colectivo sinala ademais que a alta interinidade provoca unha continua saída de funcionarios cara outros destinos, dificultando a estabilidade do servizo.
Os procuradores consideran que a nova Lei Orgánica de eficiencia do Servizo Público de Xustiza non mellora a situación en partidos xudiciais como o de Carballo.
Por iso, reclaman ás administracións competentes unha intervención urxente para reforzar os recursos humanos e garantir unha xustiza máis áxil e eficaz.
