A conselleira de Medio Ambiente, Ángeles Vázquez, asegurou no Parlamento de Galicia que a tramitación administrativa do proxecto da planta de biogás prevista en Soandres, na Laracha, “non significa apoiar” a iniciativa, senón “cumprir a lei”.
O gran problema: Koldo, Ábalos, Zapatero
En alusión as críticas do PSOE declarou: “Pero claro que vostedes están moi habituados a non cumprir absolutamente nada. Koldo, Ábalos, Zapatero e outros. Ese é o gran problema”
Durante a súa intervención, a titular autonómica respondeu ás críticas da oposición arredor da actuación da Xunta neste expediente, defendendo que a Administración galega está obrigada a actuar conforme á normativa vixente e aos informes sectoriais correspondentes.
“Isto é lei básica estatal”
“Tramitar non é apoiar e cumprir a lei”, afirmou a conselleira, quen acusou aos grupos da oposición de utilizar o conflito arredor da planta “por un puñado de votos”. Neste sentido, sostivo que “non me verá vostede aquí nin mentir nin utilizar os veciños”.
Ángeles Vázquez insistiu en que a regulación deste tipo de instalacións depende en boa medida da normativa estatal. “Isto é lei básica estatal”, remarcou, engadindo que as comunidades autónomas teñen “a obriga única e exclusivamente de facer caso dos informes sectoriais”.
Presentar alegacións
A conselleira tamén apelou aos colectivos contrarios ao proxecto para que presenten alegacións durante o proceso administrativo: “Axúdenos a presentar as súas alegacións. Iso é o que teñen que facer, nin máis nin menos”.
Durante o debate parlamentario, Vázquez relacionou ademais o impulso ao biogás coas políticas defendidas polo Goberno central, lembrando declaracións da goberno de Pedro Sánchez sobre a aposta polo “hidróxeno verde” e polo “biogás”.
O proxecto da planta de biogás de Soandres xerou contestación veciñal e política na comarca, con críticas polo posible impacto ambiental e territorial da instalación.