O pavillón do IES Agra de Leborís acolleu este sábado a tradicional Festa Homenaxe aos Maiores organizada polo Concello da Laracha, unha cita na que participaron 670 persoas maiores de 55 anos, xubiladas ou pensionistas do municipio.
A xornada comezou ás 13:30 horas cunha misa oficiada polos párrocos D. Manuel Boullón e D. Manuel Mallo. A continuación tomou a palabra o alcalde, José Manuel López Varela, quen deu a benvida aos asistentes e puxo en valor as diferentes actividades dirixidas ao colectivo das persoas maiores que promove o Concello ao longo do ano.
Durante a súa intervención, o rexedor destacou especialmente as iniciativas orientadas á prevención da soidade non desexada e á promoción do envellecemento activo, subliñando a importancia de favorecer espazos de convivencia e participación social para este sector da poboación.
O menú do xantar estivo composto por empanada, polbo á feira, carne asada, sobremesa e café, nun ambiente de convivencia e encontro entre os asistentes.
Xa pola tarde, e antes do inicio do baile previsto para as 17:30 horas, o alumnado participante na actividade de Bailes en Liña do programa municipal “Saudables” ofreceu unha exhibición diante do público presente.
Como é habitual nesta celebración, o alcalde e a concelleira de Servizos Sociais, Rocío López, fixeron entrega dun detalle institucional ás persoas de maior idade asistentes ao evento.
A homenaxe recaeu en Josefa Esperanza Vázquez Castiñeiras, veciña da Agrela, na parroquia de Lestón, que conta con 101 anos de idade, e en Manuel Sánchez Tuset, veciño da Porta Santa, tamén na parroquia de Lestón, de 94 anos.
A celebración desenvolveuse nun ambiente festivo e de confraternidade, consolidándose un ano máis como unha das citas sociais máis destacadas para as persoas maiores do municipio
