A plataforma Stop Biogás A Laracha reiterou o seu rexeitamento ao proxecto dunha planta de biogás prevista na parroquia de Soandres e alertou do posible impacto ambiental e social da instalación, situada, segundo denuncian os veciños, a escasos metros de varias vivendas.
Entrevista no programa Na Encrucillada de Radio Xallas
Falta de información sobre o proxecto
Nunha entrevista en Radio Xallas un portavoz da plataforma, Manuel Velo, explicou que a veciñanza coñeceu o proxecto pouco antes da súa exposición pública e criticou a falta de información previa. Segundo indicou, a planta estaría destinada á xestión de arredor de 63.000 toneladas anuais de residuos orgánicos, incluídos lodos de depuradora e restos de matadoiros.
Tráfico pesado e cheiros
Velo advertiu de que a actividade podería supoñer un incremento do tráfico pesado na zona, así como a emisión de cheiros e gases “moi perigosos” preto das vivendas. “As casas máis próximas están a 300 metros”, asegurou, ao tempo que apuntou que unhas 500 vivendas poderían verse afectadas no radio de influencia da planta.
A plataforma sostén tamén que o proxecto podería afectar ao río Anllóns e cuestiona os posibles vertidos derivados do tratamento dos residuos. Ademais, os veciños expresaron a súa preocupación polo impacto sobre o valor das propiedades e sobre a calidade de vida na contorna.
O proxecto tamén afectaría a mámoa da Chousa Grande.
Manuel Velo asegurou que non se opoñen ás plantas de biogás vinculadas a explotacións gandeiras que xestionen os seus propios residuos, pero diferenciou ese modelo da iniciativa proxectada na Laracha, que recibiría residuos procedentes de distintos puntos.
A mobilización veciñal recibiu o apoio dos grupos políticos con representación no Concello da Laracha e tamén da Deputación da Coruña, onde se aprobaron mocións de respaldo ás demandas da plataforma.
Os afectados continúan coa recollida de alegacións ao proxecto, cuxo prazo de presentación remata o próximo 26 de maio.
