Máis de 800 veciñas e veciños de Mazaricos participaron este sábado na Festa dos Maiores 2026, celebrada no Polideportivo Municipal da Picota, nunha xornada centrada na convivencia das persoas maiores de distintas parroquias.
O encontro, organizado polo Concello de Mazaricos, reuniu centos de asistentes arredor dun xantar no que se serviu empanada, polbo e carne ao caldeiro. A celebración estivo amenizada polo grupo musical Élite.
Un dos momentos máis destacados da xornada foi a lectura dunha regueifa composta para a ocasión por José Cambeiro ‘Uleiro’, veciño do lugar do Xián, na parroquia de Arcos. A peza foi lida polo tenente de alcalde, Jorge Villar, e serviu como recoñecemento á cultura popular galega e ao papel da xente maior na conservación das tradicións.
Segundo indicou o Concello, a presenza da regueifa buscou poñer en valor esta expresión da cultura oral galega e reivindicar a transmisión xeracional dos costumes e da identidade cultural.
A corporación municipal tamén participou na celebración, compartindo a xornada coas persoas asistentes e agradecendo a súa contribución ao desenvolvemento do municipio. Xunto co alcalde, Juan Blanco e os membros do goberno local tamén estaban o portavoz do PP, José Manuel Caamaño e de Espazo Común, Javier González.
O tenente de alcalde, Jorge Villar, destacou a elevada participación rexistrada nesta edición e afirmou que “ver máis de 800 persoas maiores xuntas, compartindo mesa, rindo e desfrutando, é a mellor recompensa ao traballo de todo o ano”.
Sobre a regueifa elaborada por José Cambeiro, Villar sinalou que “foi un momento máxico” e engadiu que esta tradición “é a nosa memoria en verso”.
