A Autoridade Portuaria da Coruña comezou esta semana os traballos de restauración do emblemático Faro do Roncudo, situado na parroquia de Corme. As obras son o resultado dunha petición expresa realizada polo goberno local, co obxectivo de poñer en valor unha das zonas máis importantes e representativas do municipio. Esta actuación nace da estreita colaboración entre a Autoridade Portuaria e o Concello de Ponteceso.
O proxecto de restauración deseñouse baixo unha premisa fundamental: o respecto absoluto pola natureza. Deste xeito, a intervención ten como finalidade garantir que a contorna permaneza como está, mantendo a súa riqueza paisaxística e ambiental. Ao mesmo tempo, preténdese converter o faro nun espazo accesible e seguro, onde as familias de Ponteceso, así como visitantes de fóra, poidan pasear e contemplar a paisaxe da zona. A intención é que a cidadanía perciba unha mellora nas instalacións, asegurando en todo momento a protección do espazo natural.
Desde o Concello de Ponteceso quérese poñer en valor a boa sintonía entre as administracións para facer realidade esta mellora. O goberno local agradece publicamente á Autoridade Portuaria da Coruña, ao seu presidente e ao seu equipo técnico, a súa disposición para atender a solicitude e o seu compromiso coa obra.
“A restauración do Faro do Roncudo non só protexe o patrimonio marítimo de Corme, senón que consolida a aposta do Concello por un turismo sostible e de calidade, onde a natureza é a gran protagonista”, destacou o alcalde, José Manuel Mato.
O rexedor valorou o inicio dos traballos e sinalou que “o Faro do Roncudo é un dos grandes símbolos de Ponteceso e da Costa da Morte. Para nós era vital darlle o coidado que merece, pero sempre cunha liña vermella: o respecto absoluto pola nosa paisaxe”.
