O grupo municipal do PSOE en Muxía denunciou este martes a situación de “caos” na limpeza e no mantemento do municipio en plena Semana Santa, e acusou ao goberno local, de IxMuxía e PP, de desatender estes servizos básicos ao longo do último ano.
Segundo trasladaron os socialistas, a falta de actuacións afecta tanto ao núcleo urbano como ás parroquias, incluíndo espazos con valor turístico, paisaxístico e patrimonial, nun momento clave pola chegada de visitantes. A formación asegura que existen queixas veciñais e de responsables de negocios pola acumulación de lixo, presenza de maleza e deficiencias no coidado de áreas recreativas e puntos de interese.
«Unha imaxe lamentable de cara ao turismo»
O portavoz socialista, Iago Toba Campaña, sostén que a situación non mellorou coa chegada da Semana Santa e afirma que o municipio presenta unha imaxe “lamentable” de cara ao turismo. Tamén critica que o executivo local priorice outros gastos, mentres, ao seu xuízo, descuida o mantemento ordinario.
Ademais, sinala que existen espazos con dificultades de acceso e zonas públicas sen intervención recente, o que, segundo indica, repercute na calidade dos servizos e na percepción exterior do concello.
“Con esta forma de actuar, están faltando ao respecto tanto aos propios veciños e veciñas sufridores diarios do abandono das aldeas e do núcleo como da imaxe de Muxía de cara ao turismo. Con este goberno donde son moitos a mandar e poucos a facer, Muxía pasou a estar na cola comarcal en limpezas e mantemento entre outros moitos eidos”
Os socialistas reclaman ao goberno local medidas urxentes para reverter esta situación e garantir un estado axeitado do espazo público, especialmente nun período de elevada afluencia de visitantes como a Semana Santa.
FOTO- Área recreativa “Remanso dos peregrinos” en Vilar de Sobremonte- Remitida polo PSOE
