O BNG de Santa Comba solicitou ao Concello información sobre a tramitación da licenza de obra e a cesión dunha parcela municipal para a instalación dunha antena de telecomunicacións de 40 metros na parroquia de San Pedro de Cícere.
Segundo indica a formación, a documentación municipal recolle dúas cesións de fincas vinculadas ao proxecto, sen que se precise o resultado da primeira nin os motivos dunha segunda concesión. Esta última, engaden, afecta a unha parcela de 75 metros cadrados cun período de cesión de 25 anos.
O grupo nacionalista tamén pon o foco no procedemento empregado, ao sinalar que a concesión se realizou mediante decreto. Neste sentido, solicita aclaracións sobre a súa tramitación e a información facilitada á veciñanza.
Así mesmo, o BNG apunta que a actuación se xestiona mediante comunicación previa e demanda datos sobre posibles afeccións da infraestrutura no entorno, tras trasladar a existencia de inquietude entre residentes pola proximidade da antena ás vivendas.
A formación sinala que considera necesaria a mellora das comunicacións no municipio, aínda que defende que este tipo de actuacións deben desenvolverse con información suficiente e garantías para a cidadanía.
