O pleno do Concello de Camariñas aprobou o orzamento municipal para 2026, que ascende a 6.639.961 euros, cun equilibrio entre ingresos e gastos e co obxectivo de garantir a estabilidade financeira.
Segundo o goberno local, as contas priorizan a área social, que representa o 17,7% do total, con preto dun millón de euros destinados aos servizos sociais. Pola súa banda, os servizos públicos básicos concentran máis de 2,8 millóns de euros, o 42,5% do orzamento. En conxunto, estas dúas áreas superan o 60% do gasto municipal.
A área de cultura e deporte supera o millón de euros, mentres que o capítulo de investimentos acada os 720.000 euros, duplicando a contía do exercicio anterior segundo indican desde o concello destacando as seguintes actuacións: humanización das rúas Alcalde Noguera Patiño e Médico Tomás de Artaza, mellora de beirarrúas na Avenida da Coruña, ademais da mellora de pavimentos no Allo, Tasaraño, Brea e Gándara en Xaviña.
Entre as actuacións previstas inclúense melloras en rúas e vías municipais, intervencións en distintas parroquias e proxectos relacionados co patrimonio e coas infraestruturas municipais.
A alcaldesa, Sandra Insua(PSOE), destacou que “estes orzamentos están pensados nas persoas, no benestar e na calidade dos servizos públicos”, e subliñou que se manteñen os criterios de boa xestión económica.
O documento recolle tamén medidas para a amortización de débeda, cunha previsión de carga financeira duns 85.298 euros ao longo do exercicio.
Orzamentos desilusionantes “dun desgoberno que pagamos entre todos»
O grupo municipal do PP en Camariñas votou en contra do orzamento municipal para 2026 e cualificou as contas de “pouco ambiciosas e resignadas”, segundo manifestou a súa portavoz, Paula Mouzo Mas.
A portavoz sinalou que o seu grupo viña demandando a elaboración dos orzamentos e ofrecendo colaboración, pero considera que o documento “non escoita nin ao PP nin ás demandas sociais de Camariñas”.
Mouzo criticou tamén a xestión do goberno local, ao que definiu como “acomodado”, e advertiu da falta de medidas para afrontar a perda de poboación e o impacto que isto pode ter nos ingresos municipais, sinalando que o concello podería baixar dos 5.000 habitantes.
Así mesmo, o PP denuncia o uso de contratos menores e afirma que non se están licitando determinados servizos, facendo referencia ás advertencias da Intervención municipal. Neste sentido, a portavoz apuntou que “parecen estar cómodos coa fórmula dos recoñecementos extraxudiciais de crédito”, que, ao seu xuízo, evidencian unha xestión irregular.
A formación tamén cuestiona que as contas non entrasen en vigor a comezos de ano e lamenta a ausencia dun proxecto que, segundo Mouzo, “reactive a economía do concello e apoie a iniciativa empresarial”.
Ademais, criticou a falta de investimentos en distintas zonas do municipio e advertiu sobre proxectos como Aldea Madeira, sinalando que “segue criando silvas”. Segundo os populares “volven a olvidarse de investimentos moi necesarios” como unha actuación na Obra de Man e na súa contorna, na estrada da Lagoa (Camelle e Arou), en Dor ou Barrosas (Ponte do Porto) en Tasaraño, A Piosa ou A Costa (Xaviña), Santa Mariña, Brañas Verdes, ou en diferentes puntos da capital municipal de Camariñas (zona do Castillo, A Cabreira, rúas Braña Carreira, Juan Carlos I…).Tamén fixo referencia ao custo dunha sentenza urbanística, cifrado en 385.000 euros, que vincula coa xestión do goberno local.
Emendas presentadas polo BNG
O voceiro municipal do BNG en Camariñas, Xurxo Rodríguez, presentou no pleno ordinario dúas emendas ao orzamento municipal para 2026, ambas rexeitadas polo grupo de goberno do PSOE.
As propostas incluían a habilitación dunha partida para construír unha cuberta no parque infantil da escola de Camelle e a creación de dotacións económicas para impulsar pequenas instalacións deportivas en diferentes puntos do municipio.Na votación final das contas, o BNG optou pola abstención.
