O Concello de Mazaricos estima en arredor de 1,8 millóns de euros o custo necesario para reparar os danos provocados polos temporais do pasado inverno na súa rede viaria municipal, segundo unha valoración técnica externa encargada polo propio consistorio.
O informe cifra en 1.766.500 euros o investimento preciso para recuperar unhas condicións adecuadas de uso das pistas, unha cantidade que supera o 35% do orzamento municipal. As intensas choivas rexistradas durante case tres meses e o paso de máis de dez borrascas de forte impacto deterioraron de forma significativa unha rede de camiños que supera os 1.100 quilómetros e que dá servizo a explotacións agroganadeiras, fincas agroforestais e a máis de medio cento de pequenos núcleos de poboación.
Ante esta situación, o Concello traballa para garantir a transitabilidade das pistas nun momento clave para a actividade agrícola. Nos próximos días comezará a campaña de ensilado da herba e a sementeira do millo, un período no que aumenta o tránsito de maquinaria pesada polas vías rurais.
O responsable da brigada municipal de obras, Domingo Caamaño, explicou que os traballos actuais buscan habilitar accesos provisionais mentres se estudan solucións a medio prazo. “Traballamos para que todo estea transitable aínda que sexa de modo provisional. O arranxo completo vai ser imposible a curto e medio prazo porque os recursos municipais son totalmente insuficientes para isto”, sinalou.
O Concello solicitou ademais unha reunión coa consellería de Medio Rural da Xunta de Galicia co obxectivo de trasladar a situación e pedir apoio institucional para afrontar as reparacións.
Desde o consistorio sublíñase que a rede viaria municipal resulta esencial para a actividade económica do municipio, xa que conecta explotacións, fincas e núcleos rurais, e o seu deterioro afecta tanto á produción agroganadeira como á mobilidade e á seguridade da veciñanza.
