O goberno local de Corcubión, encabezado polo BNG, trasladou aos grupos da oposición o borrador da modificación da ordenanza municipal sobre tráfico, circulación de vehículos a motor, seguridade viaria e utilización das vías públicas, co obxectivo de que poidan analizar o documento e formular propostas antes da súa tramitación definitiva.
Segundo informou o executivo municipal, o texto foi remitido aos grupos do PSOE, PP e Sempre Corcubión para facilitar o estudo detallado das modificacións e abrir un proceso de diálogo previo á súa aprobación. O goberno local pretende levar a proposta ao pleno ordinario previsto para o mes de maio.
A intención é que a nova regulación poida entrar en vigor durante o verán, unha vez completado o proceso de revisión e debate cos distintos grupos municipais.
As modificacións da ordenanza buscan introducir medidas destinadas a mellorar a convivencia nas rúas, especialmente no casco histórico da vila, que segundo o Concello soporta unha importante presión derivada do tráfico de vehículos.
Actuacións con permanencia no tempo
O executivo municipal sinala que o obxectivo destas medidas é “establecer actuacións con permanencia no tempo para mellorar a convivencia nas rúas, protexer o patrimonio e garantir un espazo público máis seguro e habitable para a veciñanza”.
Entre as novidades que incorpora o borrador figura a posibilidade de contar cun vixiante municipal. Esta figura está contemplada na Lei de Policía Local de Galicia para aqueles concellos que non dispoñen dun corpo propio de policía local e permite contar con persoal encargado de ordenar, sinalizar e dirixir o tráfico no solo urbano legalmente delimitado.
A proposta tamén desenvolve ferramentas xa previstas na normativa municipal anterior para reforzar a xestión e a ordenación do tráfico no municipio.
Co traslado do borrador á oposición, o goberno local sinala que cumpre o seu compromiso de manter o diálogo cos distintos grupos políticos co obxectivo de avanzar nun modelo de vila máis accesible e adaptado ás necesidades da veciñanza.