A deputada do PSdeG-PSOE no Parlamento galego, Patricia Iglesias, reclamou a dotación dunha ambulancia medicalizada para as comarcas da Costa da Morte, ao considerar que se trata dun recurso “esencial e imprescindible para ter unha atención de urxencia e de calidade”.
Nunha iniciativa presentada na Cámara autonómica, a parlamentaria socialista subliñou que a veciñanza leva “25 anos, que se di pronto, esperando por ter unha ambulancia medicalizada” para a zona da Costa da Morte e de Bergantiños.
Iglesias advertiu da importancia de contar cun dispositivo destas características ante emerxencias sanitarias graves. “Pensemos nun infarto ou un ictus, onde realmente un minuto é esencial e cuestión de vida ou morte”, sinalou.
Na actualidade, segundo indicou, a ambulancia medicalizada máis próxima atópase na Coruña, o que, ao seu xuízo, supón unha demora considerable na atención. A deputada apuntou tamén á distancia co hospital comarcal de Cee e lembrou que “os núcleos de poboación da Costa da Morte están moi espallados”, unha circunstancia que, segundo afirmou, reforza a necesidade de dotar á comarca deste recurso sanitario.
A parlamentaria socialista cualificou esta demanda como unha reivindicación histórica “tanto da veciñanza como tamén do Partido Socialista” ao longo de distintas lexislaturas e avanzou que o seu grupo continuará insistindo nesta petición.
“Esixirémoslle á Xunta de Galicia, ao goberno galego e ao Sergas que doten dunha vez por todas a esta comarca dunha ambulancia medicalizada”, concluíu.
