O Concello presentou un estudo pioneiro para analizar o benestar emocional e a saúde mental da infancia e da adolescencia do municipio, co obxectivo de elaborar unha diagnose que oriente futuras políticas públicas neste ámbito.
A iniciativa foi dada a coñecer polo alcalde, José Manuel López Varela, xunto á concelleira de Servizos Sociais, Rocío López, a técnica municipal Mari Ameijeiras e a directora do Centro de Información ás Mulleres (CIM), Ana Aldao. Segundo explicou o rexedor, o proxecto responde á necesidade de contar cun coñecemento máis directo da situación nun eido que cualificou de especialmente sensible.
A concelleira enmarcou o estudo no programa Cidades Amigas da Infancia e no Plan Local de Infancia e Adolescencia, que recolle expresamente a elaboración desta análise. Para o seu desenvolvemento, o Concello contará coa colaboración dos tres colexios de educación infantil e primaria (CEIP) e do instituto (IES) do municipio, así como con entidades deportivas e culturais e co centro de saúde.
Plan de traballo
A recollida de información entre o alumnado realizarase mediante cuestionarios estruturados, en formato dixital ou físico, que se cumprimentarán en horario lectivo. O instrumento foi deseñado a partir de escalas e evidencias científicas consolidadas e adaptado ás distintas idades. Avaliará cuestións como o estado emocional, a satisfacción coa vida, as relacións familiares e sociais, a experiencia educativa, os hábitos de lecer e o uso das novas tecnoloxías.
Ademais, o proceso incluirá entrevistas, enquisas e foros de discusión con familias, profesorado e profesionais dos ámbitos social, educativo e sanitario. Tamén participarán os membros do Espazo de Participación da Infancia e Adolescencia (EPIA), que contribuirán á interpretación dos resultados e á formulación de propostas.
Os datos recompilados permitirán elaborar un informe técnico que servirá de base para o deseño de programas de promoción do benestar emocional e de prevención de posibles dificultades de saúde mental en idades temperás. O Concello prevé presentar as conclusións no vindeiro curso escolar.
