As dez borrascas de gran impacto rexistradas no que vai de 2026 en Mazaricos provocaron 132 incidencias na rede municipal de iluminación pública, segundo o balance realizado polo departamento de Servizos do Concello.
Os temporais —Goretti, Harry, Ingrid, Joseph, Kristin, Leonardo, Marta, Nils, Oriana e Pedro— sucedéronse durante os dous primeiros meses do ano, activando múltiples alertas meteorolóxicas de nivel amarelo e laranxa por vento e choiva na comarca.
De acordo cos datos facilitados polo consistorio, os danos máis graves estiveron relacionados co impacto dos raios durante as tormentas eléctricas, que afectaron a diversas infraestruturas. Entre as incidencias rexistradas figuran cadros eléctricos queimados que tiveron que ser substituídos por completo, farolas con danos irreparables nos seus compoñentes electrónicos e distintas avarías na rede de subministración do alumeado público.
Os servizos municipais levan semanas traballando na reparación e reposición do servizo nas zonas afectadas. Nalgúns casos, segundo sinalan fontes municipais, foi preciso substituír equipamentos completos, o que alongou os prazos de actuación.
O Concello pediu desculpas polas molestias ocasionadas á veciñanza, especialmente nas áreas que permaneceron máis tempo sen iluminación, e subliñou que se tratou dunha “sucesión de temporais excepcional” concentrada nun curto período.
Para comunicar incidencias, o consistorio lembra que a cidadanía pode empregar a aplicación móbil municipal ou contactar telefonicamente cos servizos municipais.
