O Concello de Camariñas nomeará a Marcial Mouzo, Fillo Predilecto o 15 de xullo, véspera da festividade da Virxe do Carme.
O Concello de Camariñas celebrará o vindeiro 15 de xullo o acto oficial no que nomeará ao locutor Marcial Mouzo Vidal como Fillo Predilecto da vila, a máxima distinción que pode outorgar a corporación municipal a un veciño nacido no municipio.
O goberno local sinala que con este recoñecemento quere render homenaxe ao comunicador camariñán, recentemente xubilado despois de anos dirixindo as madrugadas da Radio Galega, e poñer en valor o seu vínculo coa localidade.
A alcaldesa, Sandra Insua, explicou que “Camariñas devolveralle a Marcial Mouzo unha pequena parte de todo o cariño e a dedicación que el repartiu ao longo da súa extensa e exitosa carreira profesional” e avanzou que se convidará á veciñanza a participar nun acto que cualificou de especial para a vila.
Pola súa banda, o propio Marcial Mouzo reaccionou nas redes sociais tras coñecer o anuncio: “Vivo sen vivir en min. Estou nunha nube de emocións, a ver se aguanto a presión! Moitas grazas, Camariñas!”.
