A Xunta de Galicia investirá máis de 46.000 euros na mellora da escola infantil de Fisterra, pertencente á rede pública autonómica. O xerente do Consorcio Galego de Servizos de Igualdade e Benestar, Perfecto Rodríguez, e o alcalde, Luís Insua, asinaron hoxe o convenio de colaboración e visitaron o centro.
As obras, que executará o concello durante o verán aproveitando a inactividade do centro, inclúen o subministro e instalación de toldos no patio exterior, o pintado de fachadas, aulas e comedor, a instalación dun novo falso teito na cociña, a renovación das mosquiteras, rodapés e protectores de esquinas, e unha nova porta de acceso a aulas.
Perfecto Rodríguez destacou que esta actuación se enmarca no compromiso da Xunta coa atención á infancia e co apoio á conciliación das familias. Subliñou que este é o cuarto curso consecutivo no que as familias galegas non pagan pola escolarización nos centros de 0 a 3 anos, o que sitúa a Galicia á cabeza da escolarización nesta etapa cunha taxa do 65%, 15 puntos por riba da media nacional.
As melloras na escola infantil de Fisterra forman parte dun programa máis amplo de intervencións en centros de 0 a 3 anos de titularidade municipal e autonómica. Para estas actuacións, a Xunta destinará preto de 980.000 euros procedentes do Fondo de Cohesión e Transformación Social, que permitirán reformas, ampliacións, renovación de cubertas e fachadas e mellora de equipamento segundo as necesidades de cada centro.
