O Concello de Zas convoca á veciñanza a unha reunión informativa para analizar a situación do Centro de Saúde, que nos últimos meses está a sufrir dificultades pola falta de persoal sanitario. A cita será este venres, 13 de febreiro, ás oito da tarde, no Centro Sociocultural de Zas.
Segundo explica o Concello, a marcha dun dos médicos titulares e a ausencia de pediatra están a reducir os servizos dispoñibles, con consecuencias directas na atención á poboación. Entre elas, un alongamento significativo dos prazos para conseguir cita médica e problemas recorrentes para cubrir suplencias, especialmente en períodos de baixa ou vacacións.
Un servizo esencial
Desde o goberno local, o alcalde Manuel Muíño sinala que a situación está a xerar preocupación entre a veciñanza, en particular nos colectivos máis vulnerables. O Concello indica que o obxectivo da reunión é abrir un espazo de diálogo coa cidadanía, informar con transparencia, recoller achegas e valorar medidas para reclamar unha solución ás administracións competentes.
Muíño asegura que “a sanidade pública é un servizo esencial e non podemos permitir que o noso Centro de Saúde siga perdendo recursos sen que se dean respostas claras”. Engade que a falta de persoal está a sobrecargar o servizo existente e a obrigar á veciñanza a esperar máis do razoable para ser atendida.
O alcalde lembra que, segundo o Concello, non se trata dun problema puntual, senón dunha situación que se prolonga no tempo e que non está a ser resolta con regularidade a través de suplencias.
