O Pleno de Santa Comba aprobou, cos votos a favor do PSOE e a abstención do PP, o Plan provincial de cooperación ás obras e servizos de competencia municipal (Plan único de concellos) da Deputación da Coruña, cun orzamento global de 1.207.139,07 euros.
Destínanse 725.193,40 euros a obras e outros 481.945,67 euros para gasto corrente. “Entre o plan inicial e o complementario imos chegar a todas as parroquias”, afirmou Alberto Romar, que destacou a aposta polo aglomerado para as melloras viarias.
Tres proxectos cunhas trinta actuacións
Na parroquia de Castriz actuarase na estrada de Boimente e nos núcleos de Padreiro e Frieiro. Tamén se acometerán obras nos núcleos de Recarei, Abeleiras, Grixoa de Esternande (2) e San Salvador (2).
No plan tamén se inclúen outras dúas actuacións nas Figueiras, na parroquia de Bazar, e a renovación do firme no núcleo de Cubelo, no Camiño da Ponte, nos accesos en Ventosa e Cerdeiras, e na rúa Ferradura.
Alón é outra das parroquias incluídas no POS+ 2026 polo Concello de Santa Comba, con tres actuacións, no Couto, en Esmorode e en Alón.
En Fontecada aglomeraranse as inmediacións do campo da festa de San Martiño, que linda coa igrexa. A parroquia de Cícere conta con outros dous proxectos, nos núcleos de Rebordelos e a primeira fase no de Mallón. Santa Sabiña tamén se beneficiará do POS+, con actuacións en Varilongo e Os Fornos, rematando cun asfaltado de medio quilómetro na costa de San Bartolomeu.
O listado complétase coas melloras no camiño interior en Vilar de Céltigos, e outros en San Cristobo e en Arán, todos eles con aglomerado. No pleno tamén se aprobou o Plan complementario, cun orzamento total de 517.044,66 euros para a execución de seis proxectos.
Debate entre PSOE e PP
“Podría haberse executado todo en obras para os veciños de Santa Comba, pero se se dedica case o 40 % para pagar facturas é porque realmente hai unha mala xestión”, manifestou a portavoz do PP, María Pose.
Pose asegurou que o seu partido non votaría en contra de obras e volveu lamentar “que non se contou con nós”.
O alcalde Alberto Romar puxo como exemplo outros concellos: “O máis serio sería deixar todo para gasto corrente como fan moitos concellos como As Pontes ou A Laracha”, ou outros da comarca que destinan a maioría destes fondos de maneira similar a Santa Comba. Romar valorou a súa xestión: «Hai anos que non se ven tantas obras e tan dispersas polo concello».
Vídeo co pleno de Santa Comba completo.
