O PSdeG-PSOE reclamará no Parlamento de Galicia melloras urxentes para os centros educativos de Zas, concretamente o CPI de Zas e o CEIP Labarta Pose de Baio. A formación asegura que a situación actual supón un “perigo para a saúde e a seguridade do alumnado e do persoal”.
A denuncia foi trasladada pola portavoz socialista en Zas, Sheila Rial, tras unha visita ao CPI acompañada por Patricia Iglesias e Aitor Bouza, membros do Grupo Parlamentario Socialista. Segundo explicou Rial, no centro conviven con humidades e filtracións, e asegura que os deshumidificadores son “uns máis nas aulas”.
Durante a visita, os representantes socialistas mantiveron encontros co profesorado e coa ANPA, que lles trasladaron as súas reivindicacións. Rial afirmou que “o que se ve nas fotos queda curto comparado coa realidade” e insistiu en que o estado do edificio afecta á seguridade e á saúde.
A continuación, tamén visitaron o CEIP Labarta Pose, onde sinalaron deficiencias como humidades, goteiras, teitos inestables e tuberías oxidadas. A portavoz socialista advertiu de problemas coa auga, indicando que “as nenas e nenos xa nin beben auga” pola falta de subministración suficiente e pola situación das instalacións.
O PSdeG avanzou que o asunto será levado ao Parlamento polo Grupo Socialista o mércores 11 de febreiro, no pleno no que, segundo indicaron, se tratará ante o conselleiro de Educación. Rial instou tamén ao Concello de Zas a implicarse na busca dunha solución.
