Ecoloxistas en Acción presentou este luns, 2 de febreiro, unha denuncia penal nos xulgados de Carballo por presuntos delitos contra o medio ambiente en relación coa falla crítica dunha balsa de residuos mineiros da mina de Monte Neme, rexistrada o pasado 31 de xaneiro.
A denuncia diríxese contra responsables políticos e técnicos da Xunta de Galicia e contra as empresas que integran a UTE MONTENEME, encargadas das obras de restauración da explotación. Entre as persoas denunciadas figuran a conselleira de Economía e Industria, o director xeral de Planificación Enerxética e Minas e un enxeñeiro de minas do departamento territorial da Coruña.
Segundo Ecoloxistas en Acción, a rotura produciuse nunha balsa situada ao sur da mina e provocou o vertido incontrolado dun gran volume de augas contaminadas con metais pesados. Estas augas descenderon polo Rego de Tuixe e o Rego dos Riás ata a Praia dos Riás, no interior da ZEPA Costa da Morte, espazo integrado na Rede Natura 2000. O vertido causou danos ambientais visibles ao longo de todo o percorrido e obrigou ao corte da estrada local entre Leiloio e Aviño.
A organización ecoloxista desmente as explicacións oficiais que atribúen o sucedido ás choivas ou á existencia dunha galería descoñecida. Asegura que a galería pola que se baleirou a balsa estaba inventariada en documentos oficiais da propia Administración autonómica desde, polo menos, o ano 1998.
Ecoloxistas en Acción relaciona directamente a falla cos traballos de restauración impulsados pola Xunta desde decembro de 2025, nos que se realizaron importantes movementos de terras que terían desprazado augas contaminadas cara a unha balsa sen condicións adecuadas de estabilidade. Parte destas augas, sinalan, deberían terse sometido a tratamento, unha actuación que representa máis da metade do orzamento do proxecto, financiado con fondos europeos Next Generation.
A denuncia tamén subliña a contradición entre as análises oficiais actuais, que descartan contaminación poucas horas despois do vertido, e as realizadas tras a falla de 2014, cando Augas de Galicia confirmou a toxicidade das augas e lodos procedentes da mesma mina. Naquel episodio vertéronse máis de 24.000 metros cúbicos de augas contaminadas, con importantes danos ambientais e económicos nas parroquias de Aviño e Razo da Costa.
Para a organización ecoloxista, o sucedido non é un feito illado, senón a consecuencia de décadas de abandono e falta de control administrativo, a pesar de que a perigosidade das balsas de Monte Neme figura en inventarios oficiais desde finais dos anos noventa. Ecoloxistas en Acción solicita a apertura de dilixencias previas, análises independentes e o acceso a toda a documentación técnica e administrativa, e anuncia que se personará como acusación popular.
fotos- ECOLOXISTAS EN ACCIÓN
