A casa do concello de Mazaricos acolleu este luns a sinatura dun convenio de cooperación do concello de Mazaricos, coa Deputación provincial e coa empresa XEAL para o acondicionamento da senda do Xallas, un proxecto que permitirá mellorar máis de 70 quilómetros de percorrido paralelo ao río. A achega provincial ascende a 294.999,34 euros, o que representa o 80 % do investimento total, cifrado en 368.749,18 euros.
O acordo foi rubricado polo vicepresidente da Deputación, Xosé Regueira; polo alcalde de Mazaricos, Juan José Blanco; e pola CEO de Xeal, María Couto. No acto tamén participaron os alcaldes de Zas, Manuel Muíño, e de Santa Comba, Alberto Romar, concellos polos que discorre o trazado da senda e que tamén se verán beneficiados polas actuacións previstas.
A subvención fora aprobada previamente polo pleno da corporación provincial na sesión do 22 de decembro de 2025.
Senda do Xallas
O proxecto ten como obxectivo poñer en valor unha ruta paisaxística de 70,3 quilómetros, destacando os seus valores naturais, culturais e etnográficos, ao tempo que se concibe como unha ferramenta de dinamización do rural e de mellora da mobilidade da veciñanza.
O deseño da senda busca minimizar o impacto ambiental, afastándose do leito do río en determinados tramos para protexer a flora e a fauna e evitar interferencias coa actividade diaria da poboación local.
Turismo da natureza
Durante a sinatura, Xosé Regueira destacou que a senda do Xallas está pensada “para a xente local”, pero tamén como “elemento tractor” para o turismo de natureza, subliñando o carácter singular dun percorrido que discorre polo único río de Europa que desemboca nunha fervenza.
Pola súa banda, o alcalde de Mazaricos, Juan José Blanco, sinalou que se trata dun proxecto “traballado durante máis de cinco anos” e destacou que “sen a colaboración de Xeal e sen o apoio económico da Deputación, esta actuación non sería posible”, ao lembrar que o inicio da ruta discorre por terreos da empresa.
O Concello de Mazaricos actuará como entidade representante dun proxecto compartido cos concellos de Santa Comba e Zas, asumindo a xestión das actuacións previstas.
O convenio terá vixencia ata o 31 de outubro e enmárcase nas competencias da Deputación da Coruña de asistencia e cooperación cos concellos.
