A corporación local de Camariñas aprobou por unanimidade a proposta do goberno local para o Plan Único 2026, consistente en destinar 319.174 euros a gasto corrente e executar a humanización das rúas Alcalde Noguera Patiño e Médico Tomas Artaza, cun orzamento de 162.528,23 euros. As s obras consistirán na renovación da rede de saneamento, de abastecemento e a pavimentación das rúas. Ademais, instalarase unha nova rede separativa para a recollida de augas pluviais.
Tamén se aprobou a proposta para o Plan Complementario, con oito proxectos que suman 518.588 euros e suporán melloras na Casa do Mar de Camelle, na pista a Mourín(Camariñas), nunha pista da Grixa(Ponte do Porto), en A Rucheira (Arou), e acometer dúas fases do chamado Plan Milleira.
A portavoz do PP de Camariñas, Paula Mouzo Mas, xustificou o voto favorable ao POS «porque todas as obras que melloren as condicións de vida dos veciños son necesarias e, neste caso, moitas delas levamos moito tempo demandándoas desde o Partido Popular». Porén, criticou que os responsables municipais dediquen gran parte deste plan provincial a gasto corrente, «deixando esquecidas actuacións importantes e urxentes solicitadas polos veciños».
Rogos e preguntas da oposición
Tamén votou a favor o Bloque. No apartado de rogos e preguntas, Xurxo Rodríguez Baña, reiterou a sua petición de melloras no parque infantil do CEIP de Camelle, o arranxo de rúas de Camariñas que están en mal estado e a limpeza de sumidoiros en diversas zonas do municipio.
Desde o Partido Popular, entre outras cuestións, demandaron o arranxo do firme da ponte de Ponte do Porto, a mellora “urxente” da estrada que comunica Camelle con Arou “moi transitada e en pésimas condicións, a necesidade de mellora da estrada do Castillo de Camariñas ou a cuberta do Museo de Man de Camelle.
Neste pleno, tamén por unanimidade, aprobouse a a ratificación do Decreto de solicitude de subvención á Deputación do investimento “Proxecto básico e de execución para a protección e posta en valor de cruceiro en Xaviña», e dúas mocións do PP e do BNG de apoio o sector pesqueiro.
