O Parlamento de Galicia acordou instar á Xunta de Galicia a “demandar das empresas distribuidoras de electricidade o cumprimento dos estándares de calidade eléctrica” en toda Galicia e “nomeadamente no concello de Mazaricos”.
E tamén se pide que se realice “un control exhaustivo da calidade da subministración de enerxía por parte das distribuidoras e a comprobar o cumprimento dos estándares”.
A iniciativa tamén recolle que a Xunta de Galicia esixirá das empresas distribuidoras “acometer de xeito urxente os investimentos necesarios para o cumprimento dos parámetros de calidade, e a rápida e efectiva indemnización ás persoas e empresas afectadas».
Proposta do BNG
A proposta, que contou co apoio do Partido Popular e do PSOE, foi presentada polo BNG. O deputado Xosé Manuel Golpe manifestou que “o Concello de Mazaricos xa é o símbolo dunha contradición estrutural: un territorio con capacidade de xerar centos de megavatios sofre cortes diarios mentres a súa infraestrutura de distribución recibe cero melloras».
Golpe denunciou a gravidade dun problema que se veu agravando nos últimos cinco ou seis meses, aínda que arrastra dende hai anos. «Mazaricos conta con instalacións eólicas e hidroeléctricas que suman unha capacidade instalada estimada de preto de 400 megavatios» apuntou.
Esta proposición foi aprobada na Comisión 6ª, Industria, Enerxía, Comercio e Turismo.
