O alcalde de Santa Comba, Alberto Romar, volveu reclamar á Xunta de Galicia prazos concretos para acometer actuacións de mellora da seguridade viaria en tres estradas autonómicas ao seu paso polo municipio. Trátase da AC-546 en San Martiño, da AC-441 na Pereira e da AC-400 no tramo comprendido entre Mourelle e Montouto, onde a ausencia de beirarrúas ou sendas peonís supón un risco constante para a veciñanza.
“Só queremos saber cando e como se pode afrontar esta necesidade”
Romar lembra que leva dous anos enviando escritos á Presidencia da Xunta, á Consellería de Infraestruturas e á delegación territorial da Coruña, sen obter resposta, a pesar de ter achegado tamén sinaturas dos veciños afectados. “Só queremos saber cando e como se pode afrontar esta necesidade”, subliña o alcalde, quen insiste en que o Concello estaría disposto a asumir determinados gastos ou o mantemento posterior, pero considera que o investimento principal debe corresponder á Xunta como titular das vías.
Segundo explica, nos tramos de San Martiño e A Pereira a perigosidade é especialmente evidente, xa que a veciñanza carece de espazos seguros para camiñar e vese obrigada en ocasións a apartarse á cuneta ante o paso dos vehículos. Trátase, engade, de actuacións puntuais e de pequena extensión que non requirirían un gran investimento. No caso da AC-400 entre Mourelle e Montouto, cun tramo de arredor de quilómetro e medio, recoñece que a intervención sería máis custosa, pero lembra que tamén existe unha demanda veciñal avalada con sinaturas.
Peticións trasladadas ao Presidente da Xunta
O alcalde asegura que estas peticións foron trasladadas directamente ao presidente da Xunta, Alfonso Rueda, e advirte da necesidade de obter unha resposta clara antes de que se produza algún accidente grave. Ademais, manifesta o seu apoio ás posibles mobilizacións pacíficas da veciñanza se continúa a falta de respostas por parte do Goberno galego.
