A secretaria xeral do PPdeG, Paula Prado, visitou Muxía, onde reiterou o apoio do Partido Popular ás demandas do sector pesqueiro para flexibilizar os controis europeos. A dirixente popular cargou contra a “incoherencia” do PSOE e o “oportunismo” do BNG no debate sobre o control da pesca.
Prado, acompañada pola portavoz local e tenente de alcalde, Sandra Vilela e a deputada autonómica Paula Mouzo Mas, asegurou que “somos o Partido da Pesca” e que “nunca imos deixar tirados aos nosos mariñeiros”. Segundo indicou, o PPdeG reclamoulle ao Goberno de Sánchez que aplicase a normativa europea “dun xeito que non afogara aos pescadores”, e afirmou que “vimos que a flexibilización era posible, só era cuestión de vontade política”. Neste sentido, sostivo que o Executivo cambiou a súa postura “grazas á insistencia do PPdeG e, por suposto, grazas á presión do sector”.
«Non más sobresaltos»
A secretaria xeral popular esixiulle ao Goberno central “non máis sobresaltos” con este asunto e asegurou que a “incerteza e a tensión” xerada ao sector do mar nos últimos días foi “gratuíta, innecesaria e totalmente evitable”. Ademais, puxo en valor a posición “clara e coherente” do PPdeG fronte a un PSOE “tan entretido cos seus asuntos de corrupción que a pesca é a súa última prioridade”, e criticou un BNG que, segundo afirmou, “en Europa segue aliado co Grupo dos Verdes, que apoiou o veto á pesca de arrastre”.
Pola súa banda, Sandra Vilela subliñou que “o PP sempre estivo ao lado dos mariñeiros e do sector” e lamentou que o Goberno central “non escoitara antes ao sector da pesca”. Vilela defendeu tamén a pesca artesanal como “sinal de identidade” e asegurou: “Pelexaremos pola pesca artesanal, o noso sinal de identidade”.
Mercosur
Prado referiuse tamén ao acordo UE-Mercosur, asegurando que o PPdeG non vai consentir que se aplique “sen as cláusulas de salvagarda automáticas e sen un reforzo claro dos controis en fronteira”, ao considerar estas medidas clave para protexer a actividade económica do agro galego.
