Os socialistas de Muxía anunciaron que eliminarán as taxas dos campamentos de conciliación se volven gobernar o concello. Fano, segundo explican, tras a decisión plenaria de PP, BNG e independentes de cobrar estes servizos ás familias, algo que o PSdeG considera unha mala xestión do actual goberno municipal.
Nun comunicado, o grupo socialista asegura que leva meses advertindo dunha perda de calidade nos programas de conciliación, que atribúe á falta de rigor organizativo e á imposición de prezos públicos. Afirman tamén que o incremento das taxas provocou un mínimo histórico de participación durante o Nadal, convertendo, segundo din, os campamentos “nos máis caros da Costa da Morte”.
O portavoz socialista, Iago Toba, sostén que o seu partido sempre se opuxo a que as familias tiveran que pagar por conciliar e defende a volta á gratuidade total dos campamentos, como —segundo lembra— sucedía cando gobernaban.
Desde o PSdeG sinalan directamente ao voto favorable do BNG como clave para que a proposta do PP e dos independentes saíse adiante no último pleno, unha decisión que consideran contraditoria coa postura pública dos nacionalistas.
Os socialistas conclúen que, se recuperan a alcaldía, os programas de conciliación volverán ser gratuítos, mantendo duración e calidade, tal e como —aseguran— ocorría en mandatos anteriores.
