A deputada do PSdeG, Patricia Iglesias, criticou hoxe o proxecto do presidente da Xunta, Alfonso Rueda, para prolongar a AG-55, lembrando que o tramo anunciado entre Santa Irena e a estrada AC-432 só terá unha calzada compartida para ambos sentidos, polo que “non vai ser autovía, vai ser un corredor”.
Iglesias explicou que a ampliación da autovía da Costa da Morte é un proxecto iniciado polo Goberno de Touriño, que prevía levar a AG-55 ata Berdoias, máis de 15 quilómetros máis alá do punto actual. A parlamentaria socialista recriminou que Feijoo paralizara esta obra cando chegou á Xunta en 2009, provocando anos de atraso. Segundo Iglesias, o novo treito só estará rematado cara ao 2028, “coincidindo coas eleccións autonómicas”.
A deputada asegurou que o PSdeG manterá o seu compromiso coa finalización da infraestrutura e seguirá reivindicando no Parlamento a prolongación ata Berdoias, tal como estaba previsto no proxecto orixinario.
Ademais, Iglesias criticou a “incoherencia” do Goberno do PP respecto ás peaxes. Mentres nas autoestradas estatais os usuarios teñen bonificacións de ata o 75 %, na autoestrada da Costa da Morte, de titularidade autonómica, mantéñense peaxes consideradas abusivas no tramo Carballo-A Coruña. A parlamentaria denunciou que o PP trata así aos veciños como “habitantes de segunda” e subliñou a necesidade de políticas que melloren a mobilidade e a igualdade territorial na comarca.
