A corporación municipal de Zas aprobou este luns, nun pleno extraordinario, a Relación de Postos de Traballo, a RPT do concello.
De acordo coa información municipal, o documento é resultado dun proceso de negociación sindical no que participou Comisiones Obreiras, dentro dun diálogo aberto ás organizacións sindicais con representación, que foron convidadas a formar parte das negociacións.
Fontes municipais sinalan que a aprobación da RPT supón a actualización e redefinición das funcións dos distintos postos, a súa adaptación á normativa e á organización actual da administración local, así como a creación de novos postos para reforzar a prestación dos servizos municipais.
Praza do Campo
No mesmo pleno, aprobouse tamén a participación do Concello de Zas no POS+ Adicional da Deputación da Coruña. O acordo permitirá financiar o proxecto de renovación e mellora da accesibilidade da Praza do Campo, situada no núcleo urbano da localidade.
A actuación contará cun orzamento total de 685.223,39 euros, que inclúe a achega provincial, a achega municipal e a colaboración da Xunta de Galicia.
O alcalde de Zas, Manuel Muíño, explicou que “con estas decisións seguimos a traballar nun dobre eixe fundamental: por unha banda, dotar ao Concello dunha estrutura de persoal moderna e ben organizada, e por outra, impulsar investimentos estratéxicos que melloren os espazos públicos e a calidade de vida dos veciños e veciñas”.
