O Partido Popular de Muxía expresou o seu malestar pola visita realizada esta semana polo presidente da Deputación da Coruña ao municipio sen comunicar nin informar previamente ao Goberno local. Segundo a formación, esta ausencia de comunicación “vulnera a mínima cortesía institucional” e supón un trato inadecuado cara ao Concello.
A portavoz municipal do PP, Sandra Vilela, cualificou este feito como “un comportamento impropio dunha institución pública, que debería practicar a cooperación e o respecto, non a opacidade e a discriminación política”. Engadiu que a visita “non é unha falta de respecto ao PP nin á coalición que goberna: é unha falta de respecto ao pobo de Muxía”.
O convenio para a reforma do polideportivo, no centro das críticas
Ademais do sucedido coa visita, o PP anunciou que levará ao próximo pleno da Deputación unha pregunta sobre o convenio comprometido en 2023 para a reforma do pavillón municipal, cun investimento previsto de 300.000 euros. A formación asegura que o Goberno municipal leva meses solicitando unha reunión para avanzar na tramitación deste acordo sen recibir resposta.
Vilela considera esta situación “inadmisible e impropia dunha administración que debería estar ao servizo de todos os concellos, gobernen quen gobernen”. Pregúntase tamén se a Deputación mantén os mesmos criterios que no mandato anterior: “¿Cambiaron as necesidades dos muxiáns só porque cambiou a cor política do Goberno local?”.
Segundo a portavoz, cando o PSOE gobernaba en Muxía “a Deputación consideraba prioritaria esta obra”, mais agora, coa chegada dun novo executivo municipal, “parece desaparecer ese interese”.
O PP reclama explicacións e garantías de igualdade institucional
O grupo municipal demanda respostas claras sobre varios puntos: por que non se produciu ningún avance no convenio, por que non se respondeu ás peticións de reunión e se as prioridades da Deputación dependen ou non da afinidade política dos gobernos locais.
A portavoz popular insiste en que esta maneira de proceder supón “un desprezo absoluto aos veciños e veciñas de Muxía, que merecen ser tratados con igualdade, dignidade e respecto institucional”.
Chamamento á lealdade institucional
Vilela conclúe que “un cambio de goberno non pode ser unha escusa para castigar un concello” e lembra que “as necesidades son as mesmas antes e agora”. Por iso, reclama que o presidente da Deputación actúe “como presidente de todos os coruñeses, non como militante dun partido”.
O PP de Muxía reafirma o seu compromiso de defender os intereses do municipio en todas as institucións e avanza que continuará esixindo “a lealdade institucional que Muxía merece”.
