O Concello de Fisterra reuniu no Salón de Plenos a representantes do sector turístico local co obxectivo de analizar o desenvolvemento da tempada estival recentemente finalizada e comezar a planificación das accións para o ano 2026.
No encontro participou o alcalde de Fisterra, Luis Insua, acompañado polo presidente do Clúster de Turismo de Galicia, Cesáreo Pardal, e polo membro da directiva Jesús Picallo. A entidade realizou unha análise da situación turística a nivel autonómico, destacando as novas oportunidades que se presentan para o municipio e para o conxunto da comarca. Segundo expuxeron, a consolidación e fortalecemento da marca Fisterra será determinante nos próximos anos.
Pola súa banda, o alcalde Luís Insua explicou o plan de acción que o executivo municipal está a desenvolver desde a toma de posesión. Entre as liñas avanzadas figuran a renovación da sinalización turística, a reubicación da estación de autobuses e melloras nos paseos marítimos, ademais doutras actuacións destinadas a reforzar a calidade da experiencia turística no destino.
