O PSdeG-PSOE de Carballo lamentou que o novo alcalde, Daniel Pérez (BNG), xurase cumprir a Constitución Española “por imperativo legal” no pleno de investidura.
A voceira socialista local, María Carmen Vila, declarou que “nesta cuestión non pode haber medias tintas” e criticou que, ao seu xuízo, os complexos do BNG impediron que o alcalde prometese cumprir a norma que lle permite exercer o cargo.
O grupo socialista tamén censurou que Pérez non acudise á cerimonia relixiosa posterior á investidura, á que asistía o seu predecesor, Evencio Ferrero, aínda que si participou nos actos posteriores.
Vila afirmou que o alcalde, como representante da cidadanía e da institución municipal, debería guiarse por criterios institucionais. Engadiu que, segundo o PSOE, “nun momento no que a intolerancia ameaza os valores da Constitución, é máis importante que nunca defendela e amosar apoio sen ambaxes á mesma”.
O PSOE de Carballo reafirmou o seu compromiso coa Constitución e co respecto á legalidade e á vontade democrática expresada polo pobo español.
