A deputada autonómica Paula Mouzo Mas valora moi positivamente a resposta da Xunta de Galicia as peticións que lle trasladei en diferentes conversas e que recollían as demandas dunhas familias do concello de Camariñas “.
A Xunta de Galicia informou que introducirá cambios na oferta de transporte público para garantir que o alumnado de Camariñas poida desprazarse diariamente ao IES Terra de Soneira, en Vimianzo. A medida dá resposta ás demandas trasladadas polas familias, que solicitaban unha solución para facilitar a asistencia ao centro educativo.
A partir do luns 13 de outubro, habilitarase un novo servizo con saída de Camariñas ás 08:00 horas, de luns a venres, que fará parada no IES Terra de Soneira e continuará cara a Santiago. Esta proposta unifica dous servizos que ata agora funcionaban por separado: un que partía de Camariñas ás 8:25 só os luns e venres, e outro que saía de Vimianzo cara a Santiago ás 9:05 os martes, mércores e xoves. Así, mellórase a mobilidade do alumnado cara ao instituto e mantense a conexión da comarca coa capital galega.
Na volta, unifícanse tamén os servizos de regreso. O autobús sairá de Santiago ás 13:00 horas e pasará polo IES Terra de Soneira ás 14:40, garantindo un transporte axeitado para que o alumnado poida retornar a Camariñas ao finalizar a xornada lectiva.
Segundo explica a Xunta, a modificación supón integrar nun único servizo expedicións que ata agora se facían de forma separada, optimizando a oferta e axustándoa ás necesidades reais do alumnado e das súas familias.A programación actualizada pódese consultar en bus.gal.
Valoración de Paula Mouzo
A portavoz municipal do Partido Popular e deputada autonómica, Paula Mouzo Mas, valorou “moi positivamente” o anuncio da Xunta de Galicia que supón a mellora do servizo de bus para o alumnado de Camariñas que acode ao IES Terra de Soneira de Vimianzo.
Paula Mouzo agradece “a receptividade e o interese” da Consellería de Presidencia da Xunta e a “firme vontade” de dar solución “as peticións que lle trasladei en diferentes conversas e que recollían as demandas dunhas familias do concello de Camariñas “.
Neste senso, Mouzo destaca o “traballo” da Directora Xeral de Mobilidade, Judit Fontela e da directora territorial Mar Ferreiro “que estiveron sempre atentas a nosa solicitude, que finalmente se traduce nun beneficio para estos alumnos e as súas familias”.
No último pleno da corporación de Camariñas, a portavoz do PP informou o resto dos grupos políticos que había contactos coa Xunta e que se estaba “tentando encontrar unha alternativa” que finalmente derivou neste anuncio.
