As nais de alumnado dos centros educativos de Muxía manifestan o seu malestar polos recortes na educación inclusiva que, segundo din, están a sufrir no CEIP Virxe da Barca e no CEIP dos Muiños neste curso 2025/26.
Segundo relatan, trasladaron estas preocupacións á inspectora educativa da Consellería de Educación nunha reunión o 19 de setembro, incidindo na falta de profesorado de apoio e no impacto negativo que, ao seu ver, isto pode ter no proceso educativo e no desenvolvemento dos seus fillos e fillas. Ademais, afirman que a redución de persoal impide cumprir as ratios en determinados momentos e dificulta cubrir ausencias por baixas ou imprevistos.
De acordo coas versións das familias, a inspectora comprometeuse nesa reunión a estudar unha solución, propoñendo como posible medida un profesor de apoio compartido entre ambos centros para manter as mesmas horas do curso pasado. A inspectora pediu un prazo de dúas semanas para ofrecer unha resposta definitiva. Porén, sinalan que a comunicación oficial chegou antes deste prazo e que en ela se lles informou da decisión de non ampliar recursos nin introducir cambios para este curso, argumentando que a situación actual é suficiente.
As familias consideran que esta resposta non atende ás súas demandas e afirman sentirse enganadas, ao entender que a petición de tempo era unha fórmula para dilatar o proceso e non buscaba unha solución real.
Ademais, sosteñen que estes recortes dificultan unha educación inclusiva e anuncian posibles mobilizacións públicas se non se produce unha rectificación.
